Wie Stein nog ein dörpke waor. Ballade van Stein , van Wil Driessen
Transcriptie
Opmerking van de invoerder
Wat is dat lang geléje, Wie eederein zich nog koos bie naam Wat laefde weer hiej toen tevréje.
Ne bienaam dae waor toen nog gans gewoon Dè hawste dao kooste niks aan doon ‘t waor Willem de Frit en Mechel in de Kuulkes Ne jong pwönde e maedje, hè goof hör è muulke.
Wie de Maas nog veur ‘t smokkele woar Den toebak dè woor op den doer auch zwaor De kemmieze die zaote os dèkker noa Weer zaote dan soms mit de hènj in ‘t haor.
Wie op eeder geutje ne verkesstal laog oet de moosem nog richtige greunte kraogs Wie ste somers op de luif nog plenke koos en neet ummer nao Dallas kieke moos.
Nao de brikke toe gaon dat waor gans gewoon De boere die leepe toen nog neet op sjoon ne sjoester dae haw ‘t toen echt neet breit Noe verknoait men ‘t geldj aan ‘n nwèzelheit
Wie in de Leentjstraot nog de auw meule laog Wie ste op eedere veldwaeg è kruuske zaogs op den Toebak nog geine bungalo laog en baoi Niks os achter de vaere zaot.
Kènt geer nog die auw plaetskes in Stein? ‘t Tonkelwetje, Kattegetske en de Taterstein die Ziepe, de Luiterhook en de Brèjmeberg de Steivesstraot, de Baantj en de Bekker op de Berg?
De kènjer die speelde toen nog mit ‘n rijp Ze sjaote mit de flitsspuit of heujde de geit De maedjes lagte spange of bikkelde op straot De jonges die voetbalde mit ein verkesblaos.
Wie Sjang van Kriste en Mertien de Peep en Gus te Meijer en Neelje in de Steeg en Graad van Jappe en Pjèr de Smeed die hauwe toen kaffee dat wos geer neet.
Wie Pjèr van Pitte de Maas euver voor en Kwaob de Pom mit de zèndjkar voor en Ties de Sidder nog körver waor en Gim de Brak neet bie Zjange in de Sjiethook zaot.
Wie Steindenaers nog kalde euver aane en inne Wie ste ‘n hengel nog in de emel koos zinne Wie bie veul kaffees ‘n beugelbaan laog en vrieje gaon in Stein nog gevjèrlik waor.
In de Brökstraot nog ‘t Slötje laog In de Hal stong de Fotsj mit zien graote waog Den Omkamp nog geine Beeleberg waor Ein vergadering van de raod nog sensatie waor.
Wie de kirmes nog op de Berrig stong De mèm nog achter ‘t wèsjbraet zong men de sonjese mès nog belanriek vonj en ‘n stuk of tjèn kènjer nog hjèl gewoon vonj.
Wie hauwf Stein nog nao de koel toe ging op eeder wèsjlien eine koelpungel hing al ging auch den ein of angere jongk doad wat wolste veur veule waor dat toch hun broad
De DSM die bestong nog neet van ‘n opereeter haw men geine weet de loch waor toen nog zuuver en klaor de zwerbelkes vlogen doe nog door de straot.
Wè wet noe nog wat ‘n maalplak is wat prut, wat ‘n heurtje en wat pratelsjiet is wat vreigele, vreglap en vraatsjele is wat sjrèume, vrènjewere en ‘n roepepel is?
Wie Sjang de Bel nog omreuper waor en Pjèr den Hummel de kookar voor bie Neske in de Steeg sjlôk te kriege waor Zwao waor dat hie vreuger, wat dachste jong?
Wie Stein ech nog ein dörpke waor wat is dat lang geléje Wie eederein zich nog koos bie naam Wat laefde weer hiej toen tevréje !
Ballade van Stein , van Wil Driessen, copyright 1983